বনগতা গুহা
শ্রী গোবিন্দকৃষ্ণ মোদক
পুরা পারসীকানাং পুরে কশ্যপোঽলিপর্বা চেতি সহোদরৌ বসতঃ স্ম
। তয়োর্জনকো নাতিপ্রভূতধনো
বভূব । সুতয়োস্তুল্যবৃত্তিরসৌ মৃত্যুং সন্নিহিতং প্রেক্ষ্য নিজং
বিত্তাদিকং তয়োঃ সমং ব্যভজৎ । যেন তৌ
বিভবাদ্যর্জনবিষয়ে তুল্যাবস্থৌ স্যাতাম্ । অথ কশ্যপঃ
কস্যচিন্মহাধনস্য পুত্রীমুদ্বহৎ । যেন সঃ সপদ্যেব নগরবাসিভির্বনিগ্বরৈস্তুল্যবিভবো বভূব । বিবিধৈশ্চ বিলাসৈঃ
কালমনয়ৎ । তথা হি প্রভূতধনত্বাৎ,ঈপ্সিতং কিমপি বস্তু তস্য দূরাসদং নাসীৎ।
যথালিপর্বনণঃ,তথা তস্য শ্বশুরস্যাপি,অল্পমেব বিত্তমাসীৎ। যেন সঃ
নিঃশ্রীক উটজে কৃতাবাসঃ,আত্মানং চ কলত্রাপত্যানি চ মহতা কষ্টেন পুপোষ
। অসৌ প্রত্যহমুষসি
সমুত্থায় ইন্ধনচ্ছেদনায় বিপিনং ব্রজতি। ছিন্নমিন্ধনং ত্রয়ানাং
গর্দভানাং পৃষ্ঠগতং করোতি। পুরমানয়তি
। তত্র চ বিক্রীণীতে। ততশ্চ লব্ধেন ধনেন
বৃত্তিং করোতি।
অথৈকদালিপর্বা নিত্যমিব বনং গতঃ।তত্র চ পর্যাপ্তং
কাষ্ঠং চিচ্ছেদ।তৎক্ষণং দূরে নভসি বিসর্পৎপাংসুটলং তস্য দৃশ্যতামগাত্ । তত্র চ দত্তদৃষ্টিরয়ং
জজ্ঞৌ এষ রজস্তোমঃ, এতমেব দেশমুদ্দিশ্য সবেগং প্রধাবতামশ্বারোহানাং
বলেনোত্থাপ্যতে । যতোঽস্মিন্দেশে
রাজপুরুষাঃ ন সংচরন্তি , ততঃ তুরংগসাদিভির্দস্যুভি-র্মাব্যম্ । ততোঽসাবীদৃশং প্রচ্ছন্নং কিমপি স্থানং লব্ধুং সর্বতো দৃশং
ব্যাপারয়ামাস , যত্র সঃ চৌরাপক্রমণং যাবৎক্ষেমেণ নিভৃতস্তিষ্ঠেৎ ।
চোরাংস্তু সমীপগতান্প্রেক্ষ্য , অসৌ সপদি নিকটবর্তিনং মহীরুহমারুরোহ । তস্য শাখাস্তথা
বিপুলাঃ পল্লবঘনাশ্চাসন্ , যথা তস্য স্থিতোঽয়ং স্বয়ং কস্যাপি দৃষ্টিগোচরো ন ভবেৎ
।ততো নাতিদূরে বিশালঃ শিলোচ্চয়ো বর্ততে স্ম । ঋজূন্নতস্য
যস্য শিখরং মনুজস্য দূরাসদমাসীৎ । অথ তে হয়স্থা শৈলস্য
পাদমাসাদ্য অবারোহন্ । অলিপর্বা চ তান্গণয়িত্বা বিংশতিদ্বয়মেতানজানাত্ ।তৌঃ স্বস্বসপ্তয়ো
দৃঢ়গুল্মশাখাসু বদ্ধাঃ , তেষাং বল্গা অপনীতাঃ , কণ্ঠেষু চ ধান্যস্যূতা আসঞ্জিতাঃ । অথ সর্বেঽপি তে
স্বস্বপর্যাণগোণীঃ আদদিরে । যা ভারবত্তয়া রজতমহারজতাভ্যাং পূর্ণা ইবাবভূঃ ।
অন্যেভ্যো বিশিষ্টাকারস্তেষামেকতমঃ , অলিপর্বণা নায়কেত্বেন গৃহীতঃ । সঃ শৈলাগ্রভাগং প্রাপ্নোৎ পপাঠ চ-
স্কন্দরাজ নমস্তেঽস্তু চৌর্যপা্টবদেশিক।
দস্যুদেব দ্বারমিদং বিবৃতং কৃপয়া কুরু।।
পঠিতমাত্র এতস্মিন্পদ্যে দ্বারমেকমপাবৃতম্ । যেন গুহান্তর্গামী
মার্গঃ প্রকাশতামগাৎ । তেন মার্গেণ
সর্বানপ্যনুচরান্প্রবিষ্টান্প্রেক্ষ্য সোঽগ্রণীঃ স্বয়মপি প্রবিষ্টঃ । দ্বারং
চ স্বত এব সংবৃতম্ ।
তে চোরাঃ কঞ্চিৎকালং গুহায়ামেব তস্থুঃ । তাবত্তু
অলিপর্বা বৃক্ষশাখায়াং স্থিতঃ । সঃ চিন্তয়ামাস-যদ্যহ্ং বৃক্ষাদবরুহ্য গৃহসকাশং গচ্ছামি
, তে চোরাঃ গুহাদ্বহিরাগচ্ছতি , অপি চ প্রাণসংশয়ং
মে ভবতি-ইতি বিচিন্ত্য সঃ তত্রাবতিষ্ঠৎ ।অথ কেনচিৎকালেন
দ্বারমপাবৃতম্ । তেন চ প্রথমং নায়কো বহিরাজগাম । দ্বারদেশে
চ স্থিত্বা সোঽগ্রণীঃ সর্বান্সহচরান্বহির্নিঃসরতো দদর্শ । ততশ্চ পদ্যমেতদপাঠীৎ-
স্কন্দরাজ নমস্তেঽস্তু চৌর্যপা্টবদেশিক।
দস্যুদেব দ্বারমিদং সংবৃতং কৃপয়া কুরু।।
পঠিতমাত্রেঽস্মিন্পদ্যে গুহাদ্বারং স্বয়মেব সংবব্রে ।পূর্বমিবৈতদপি
পদ্যমলিপর্বা স্ফুট্মাকর্ণয়ৎ । তূষ্ণীং চাবর্ত্য কণ্ঠগতমকরোৎ ।
অথ সর্বে চোরাঃ স্বস্বাশ্বানারুহ্য নিষ্কান্তাঃ । অলিপর্বা স্বস্থানং ন তত্যাজ । স হি শশঙ্কে-সদ্য এবাবতরেয়ং চেৎ, মমাপক্রমণাৎপ্রাগেব, কদাচিদ্-বিস্মৃতং কিমপি বস্তু নেতুং চোরঃ কশ্চন নিবর্তেত, দৃষ্টমাত্রং চ মাং বন্দীকুর্বীত ইতি । সঃ চিন্তয়ামাস চ কিং ময়া প্রোক্তেন পূর্বপদ্যেন দ্বারমিদং বিঘটেত ? পশ্যামি তাবৎ ।ততঃ পরং দৈবস্যায়ত্তম্ । এবং বিচিন্ত্যাসৌ বৃক্ষতোঽবতীর্য গুল্মমধ্যেন শৈলমুখং যাবৎ বব্রাজ, পদ্যং চৈতৎপপাঠ- স্কন্দরাজ নমস্তেঽস্তু চৌর্যপা্টবদেশিক। দস্যুদেব দ্বারমিদং বিবৃতং কৃপয়া কুরু।। উচ্চমাধ্যমিক সংস্কৃত
অস্মিন্গীতমাত্রে দ্বারং বিবৃতম্ ।গুহাভ্যন্তরং প্রবিশ্য অলিপর্বা সর্বতঃ রাশিকৃতানি ভক্ষ্যাণি, মহার্ঘাণাং চীনাংশুকানাং, কনকস্য রজতস্য চ স্থূলস্থূলান্শলাকান্দদর্শ । ততোঽসৌ স্বর্ণপূর্ণাস্তাবতীরজিনগোণীরাদদে, যাবতীর্বোঢুং তস্য গর্দভাঃ প্রভবেয়ুঃ । তাশ্চগোণীর্যাতায়াতৈর্দ্বারদেশমানয়ৎ । অথ বিবৃতিমন্ত্রেণ দ্বারং বিবৃত্য তা গোণীর্ণিষ্কাস্য রাসভপৃষ্ঠান্যারোপ্য কাষ্ঠৈশ্ছাদয়ামাস । ততোঽসৌ সংবৃতিমন্ত্রং ব্যাজহার । দ্বারং চ সপদি সংবৃতম্ । ততোঽয়ং দ্রুততরং ক্রামন্নগরং নিবৃত্তঃ ।
0 মন্তব্যসমূহ